2025/8/16
Arrasate Errugbi Taldeko 16 urtez azpiko jokalari Areeb Ul Hassan, istripu larri baten ondorioz, zendu dela jakin izan dugu. Klubetik bere familia eta senitartekoei gure samina adierazi nahi diogu, eta doluminak helarazi. Goian bego Areeb.
Julen Barrutiaren mutilei bost partidu baino ez zaizkie geratzen sailkapen fasea amaitzeko eta, momentuz, tinko eusten diote bigarren postuari. Larunbat honetan, 16:45ean, Durangori egingo diote bisita. Senior mailako neskek atsedenaldia izango dute, eta amen taldea Donostian izango da.
Joseba Zabalak zuzendutako Geurea RT-k egungo lider Gaztediri egingo dio bisita zapatuan (16:00) eta, irabaziz gero, lehen postua eskuratuko du. Egun berean, baina 13:00etan, senior mailako mutilek Uribealdea hartuko dute Mojategin.
Julen Barrutiaren mutilak aise nagusitu ziren Atletiko San Sebastianen kontra, Mojategin, jokatutako partiduan. Arrasatearrek hasiera hasieratik bideratu zuten lehia eta, amaieran, markagailuak 59-12ko emaitza erakutsi zuen.